اللقاء المفتوح

سميرة من اسفى

كيكة بالجزر

4 البيضات
1 كاس السنيدة
1 كاس الزيت
1 كاز الجزر محكوك رقيق ويكون الكاس عامر بزاف
1 دانون الفريز
3 م ك الخل
3 م ك الكاكاو او حسن اللون للى بغات كل سيدة
3 الخمارات
1 فانى
طحين

نطربو ابيض البيض متل التلج مع قبصة الملح وندخلوه للمجمد ماشى للتلاجة
فى الخلاط نعملو اصفر البيض وسنيدة نخلطوهم مزيان تم الزيت ودانون والجزروالخل والكاكاو ونصبوه فى انية ونضيفو الطحين مع الخمارات وابيض البيض نصبوه فى المول وتدخل للفرن ملى تبرد ممكن تدهن بالشكلاط مدوب مع دانون ونرشو عليها الشكلاط محكوك او نعملو الكلاصاج فيه كاس الماء+1/2 كاس السنيدة+1 م ص نسكافى+طرف الزبدة او الزيت+شكلاط غبرة الكل على النار حتى يختار ونصبوه على الكيكة وتزش بالشكلاط ابيض محكوك او تقسم على 2 وتعر بلكريم.....

طريقة باش نفورو الكسكسو غير مرة وحدة ونربحو الوقت نشريو ديال البكية تنبسبسوه بالزيت والملح ونصبو عليه الماء طايب غير جهد للى يتغطى فيه فقط ونخليوه حتى يشرب نحركوه شوية باليد نعملو ليه الزيت او سمن ونفوروه مرة وحدة ونسقيوه ونقدموه

مريم من فرنسا

مربى التمر

كيلو التمر يكون قاصح ولونه غامق
3 الكيسان عنبة ديال الما
3 م سنيدة
5 القرنفلات
عصير نصف حامضة

نقلبو التمر من الوسط ونخليو العظم فيه نعملوه فى الكوكوط مع الماء ونسدو عليع غير تصفر نحسبو 1/2 ساعة ونطفيو ملى يبرد نعملوه فى زيف حياتى ونعصروه فى طنجرة تيبقى غير العظام وديك القشرة فقط وهاديك العصارة نعملوها على النار مع سنيدة والقرنفل مع التحريك حتى يبدا يجمد عاد نضيفو عصير الحامض ونزولوه

ممكن ناخدو 5او6 المعالق من هاد المربى + م الزبدة نعملوها فى الخلاط مزيان حتى تولى كريما وندهنو بيه الخبز

كرواصة

500غ الطحين
1 م ك خميرة الخبز
5 م ك السنيدة
2 م ك الزبدة مدوبة
1 بيضة
1 فانى
قبصة الملح
ما دافي
250 الزبدة للتوريق +شكلاط+كريم باتسيير اختياري

الكل يتخلط وتدلك وتكون ركبة ةترتاح شوية وتعمل كويرات بحال المسمن وتورق بالزبدة وتطوى على 4 حتى نكملو تم ناخدو كل مربع نبسطوه باليد ونقسموه على 2 فى الطرف نعملو م كريم باتسيير وطرف الشكلاط او ديال الدهن وتبرم وتبقى تخمر تدهن باصفر البيض مخلط مع الحليب والزيت وتدخل للفرن

كراتان بالدنجال والمقارونية والكفتة

1 كيلو الدنجال يكون كبير
250 الماقارونية
500 الكفتة
فروماج محكوك
الربيع
4 الضروس التوم
الزيت البلدية والرومية
ملح الابزار
تحميرة
500 مطيشة
1 او 2 م ك مطيشة الحك

نعملو الدنجال شرائح طويلة وتقلى ونسبقو المقارونية وتصفى والكفتة تتشحر مع التوابل وتبقى مفرتة ونقطعو مطيشة وتشحر مع التوابل ومطيشة الحك وشوية الزيت ناخدو مول مدهون نعملو الدنجال تم المقارونية تم مطيشة تم الكفتة تم المقارونية تم مطيشة تم الدنجال وتدخل للفرت تتحمر عاد نعملو الفرماج وترجع للفرن شوية

طارطة ساهلة

180غ الطحين
150 غ السنيدة
120 غ الزبدة
2 تفاحات شرائح رقيقة بزاف او مكعبات
شوية الزبيب
1 م ك القرفة
1 م الفانى
2 م ك عصير الحامض والقشرة حامضة

الطحين مع الزيدة نخلطوهم مزيان وسكر وتبقى ترتاح فى التلاجة شوية تم نخلطو التفاح مع الزبيب والقرفة والحامض ونصبوه على خليط الطحين من بعد ما نبسبسوه باليد نصبوه فى المول وتدخل للفرن

زينب من ليبيا

بطاطا معمرة بالكفتة

250 الكفنة
2 بيضات
2 بصلات كبار
1/2 خمارة
ملح الابزار
راس م ص من المروزية
شابلير
زيت للقلي

فى طنجرة نعملو البصلة محكوكة غليظة + الكفتة نع التحريك+الملح والابزار وقليل من المروزية حتى تطيب وتفرتت وتبرد عاد نزيدو بيضة +4 م ك لاشابلير وتخلط مزيان ونقطعو بطاطا دوائر غليظة وتفلح من الوسط يعنى بحال سندويتش وتعمر بالكفتة تفند فى البيض تم شابلير وتقلى فى الزيت ومن بعد تدخل للفرن وتقدم

بشرى من ايت اورير

حلوة البونجة

5 البيضات
3 الخمارات
3 الكيسان الزيت
2 كيسان ونصف سنيدة
طحين
المربى+الكوك

الكل يتخلط وتعمل كويرات او اصابع وتدخل للفرن من بعد تفند فى المربى تم فى الكوك

كبيبات الكفتة

500غ الكفتة بلا توابل
1 بيضة
بصلة محكوك
ملح الابزار
كامون
تحميرة
3 م ك لاشابلير
2 م ك الربيع مقطع
زيت للقلى+شابلير+2 بيضات

الكفتة تخلط مع كل التوابل وتعمل اصابع تفند فى البيض تم شابلير وتقلى فى الزيت وتقدم مع السلطة

مليكة مناصيف

ماسك للظهر للى فيه الحبوب او الاتر ديالو لازم يتعمل فى الدار ماشي فى الحمام ديال الزنقة

2 م طين الاخضر
2 م عصير الحامض
1 م قرنفل محون ومغربل

الكل يتخلط ونعملوه على اماكن الحبوب ويبقى حتى ينشف ونغسلوه ومن بعد ندهنو بهاد لوسيو كل يوم

2 م القرنفل مدقوق+كاس الماء طايب نخليوه حتى يبرد ويصفى ونضيفو ليه 2 م ك عصير الحامض مصفى نخليوه فى التلاجة
ندهنو بيه الظهر مرة فى اليوم او كل يومين فهو تيسد المسام وتيعقم
ومرة مرة نعوضو الطين الاخضر بالفول او الحمص مدقوقين باش حتى طبايع تتزول

من عند السيدة لطيفة من مراكش

* لتنظيف البطاطا قسبية بسهولة كنرقدوها عشرة دقائق في الماء يكون عايم عليها ثم نغسلوها بالشيتة ديال الصابون باش يزول التراب و نكرطوها بالموس

* باش نفركو الرمان و نزولو الحبات ديالو بسهولة كنغسلو الرمانة و نزولو ليها الطربوش و نشقوها بالموس على اربعة و نحلو الشقاق شوية بيدينا ثم نقلبوها فوق طبسيل و نبقاو نضربوها من الفوق بشي حاجة ثقيلة شوية مثلا ملعقة ثقيلة او يد الموس و غدي تنزل الحبات ديالها بسهولة

* للاحتفاظ بالسفرجل مدة سنة في المجمد كنزولو ليه البذور و نقيوه بلا ما نزولو ليه القشور ثم نشقوه بالموس على اربعة من الظهر ثم نديروه في ماء غليان مع شوية الملح و نخليوه يغلي مدة دقيقة واحدة ثم نزولوه و نخليوه يبرد من بعد نستفوه في بلاطو و نديروه يجمد ثم نجمعوه في بلاستيكات و نحتفظ به في المجمد

الحريرة ديال السميدة منين كتبرد كتجمد و تتكور منين نبغيو نسخنوها نزيدو عليها شوية الماء طايب و نخلطوها مزيان بالضراب اليدوي ثم نسخنوها غدي تولي بحالا يالاه طابت

* القطبان ديال البقري باش مايجيوش قاصحين نزيدو عليهم راس ديال الموس من خميرة الحلوى مع التوابل و نخليوهم مرقدين ساعة ثم نشويوهم كيجيو فتيين بحال ديال الغنمي

* للمعان الاواني ديال النحاس خصنا نحكوهم فالنهار اللي تكون فيه الشمس اولا كنحكوهم مزيان بالزنبوع (او لرنج _ الليمون المر) ثم كنشللوهم بالماء و نحكوهم بالجيكس رطب ثم نغسلوهم بالمسحوق و نديروهم فالشمس كيبقاو يلمعو مدة طويلة

* لتزيين السفة بشكل مختلف منين نديروها فطبق التقديم كناخدو بيضة بقشورها مغسولة مزيان و كنديرو بيها حفيرات وسط السفة و كل حفيرة كنعمروها بحاجة وحدة باللوز مقلي و مطحون و وحدة بالسكر كلاصي و وحدة بالزبيب معسل و هكذا حتى نكملو كتعطي منظر زوين

* البرقوق اليابس منين نبغيو نديروه مع اللحم نفوروه مزيان ثم نفلحوه بالمقص و نزولو ليه العظم و نعمروه باللوز مقلي ومطحون مخلط مع السكر كلاصي و القرفة و مازهر و شوية الزبدة ثم نعسلوه

* باش يجينا اللوز مكلي فالدار بحال ديال الزنقة كنرقدوه ساعتين في الماء ثم نصفيوه و نديروه في لاطة و ندخلوه للفران او نديروه في مقلة فوق البوطة مع التقليب مرة مرة حتى يتحمر و الا بغيناه مالح كنخلطو الماء و الملح و منين يتحمر اللوز كنرشوه بالخليط و نحركوه مزيان ثم نطفيو النار و نخليوه يبرد

الا خسرات لينا المايونيز و غلبات عليها الزيت كنزيدو عليها اصفر بيضة و نطربو مزيان حتى تعقد و نديروها في الثلاجة

* باش ما يلصقش البغرير فالمقلة منين نبغيو نسخنوه كنديرو طريف ديال الزبدة فالمقلة و نسخنوه منها يسخن و منها يتدهن من بعد يمكن نزيدو عليه غير العسل

نصائح من عند السيدة السعدية

*في حالة الا ضاع لينا البورطابل باش ما يستافدش منو الشخص اللي خداه كناخدو البورطابل ديالنا و كنضغطو على علامة نجمة * و من بعد نضغطو على # ثم نديرو 06 ثم نضغطو على # و مباشرة غدي يظهر لينا واحد الكود عبارة عن مجموعة ارقام هاد الكود خاص بالبورطابل ديالنا فقط غدي نسجلوه عندنا في مذكرة و نحتفظ به و في حالة لاقدر الله تسرق لينا البورطابل او ضاع غدي نتاصلو بالشركة اللي خذيناه من عندها و نعطيوهم الكود و هما كيبلوكيو البورطابل و مايمكن حتى واحد يستفيد منه او يبيعو لانه ماغديش يخدم ليه نهائيا

* الا خوات لينا البطارية(الباتري) ديال البورطابل و ماكانش عندنا الشارجور باش نشارجيوها كناخذوها و نلفوها في ورق المنيوم و نديروها ساعتين في المجمد ثم نخرجوها غدي تشارجا بوحدها و تخدم عادي و هذه الطريقة يمكن نديروها لكل البطاريات ديال الراديو او غيره

*باش يجيونا القطبان فتيين كنزيدو ملعقة خل ابيض مع الشرمولة و نخليوهم مرقدين ثم نشويوهم
* لتنظيف الشواية ديال اللحم من الشحوم بسهولة منين نساليو منها ناخدو اوراق الجرائد (الجورنان)و ننظفوها بيهم مزيان و هي باقية سخونة ثم نغسلوها عادي ببونجة مع المنظف بكل سهولة

1) ملى تبغى تسخنى البغرير وما يلصقش فى المقلاة غير سخنيها مزيان

2) كدلك لقلى الحوت سخنى المقلاة مزيان تم سخنى الزيت وضعى الحوت وما تحركيهش مباشرة

3) ملى تقلى اللوز فى الزيت رمى اللوز مباشرة مع الزيت وهو بارد باش يجى مكرمل

4) بفس الشئ لقلى بطاطا فريت الى جاك ضياف على غفلة وما عندك والو

1) كرواصة ديال 10 دريال تنفتح من الوسط وتدهن بكريم باتسيير تم من فوق وترش بالشكلاط شعرية

2) او تدهن بصوص بيشاميل من الداخل وتعمر بادطراف الدجاج او الكفتة او اى شئ شايط عندك
كتشحريه فى تالزبدة تم تدهن من فوق بالبيشاميل والفرماج محكوك

3) او كتسقيها بالسيرو وتعمر بمعجون الطون مع البصلة والتومة والمعدنوس الكل فى الخلاط
وتدخل للفرن غير شوية

بالنسبة للسيرو نفس قياس السكر نفسه الماء

نصائح من عند السعدية من ايمن تانونت

1) قشور البيض يكون اخضر ماشى مسلوق تنخلطوه مع التراب ديال المحابق خصوصا نباتات الظل

2) نحكو الاسنان بقشرة البرتقال من الجهة البيضاء

3) طرف الخبز تنحرقوه مزيان ونطحنوه مع شوية الملح نحكو بيه الاسنان عاد نعملو المعجون تيخليهم بيضين

) بوزروك تنرقدوه فى الماء متلج مع شوية الخرطال مدة ساعتين كل الاتربة كتبقى تحت

2) لتبييض اليدين نسلقو بطاطا وتنمعكوها مع 2 م زيت الزيتون ونعملوها على اليدين متل ماسك 2/1 ساعة وتغسل.

تبارك الله عليكم عطكم الله الصحة

الله لا يحرمكم من الجنة

بريوات بمذاق مالح و حلو

المقادير

رابعة كفتة
بصلة صغيرة محكوكة
شوية الملح
راس ملعقة سكينجبير
2 معالق كبار معدنوس مقطع رقيق
كاس زبيب بلا عظم مرطب في مازهر و مصفي
كاس لوز مصلوق و مفسخ ومنشف( ندهنوه بالزيت و نحمروه فالفران ثم ندقوه بالمهراز من الاحسن)
نصف ملعقة كبيرة مازهر
شوية القرفة مطحونة
ملعقة صغيرة سنيدة
2 معالق كبار زبدة
حكيكة صغيرة ديال الكوزة
رابعة من ورقة البسطيلة

الطريقة

في مقلة فوق النار نديرو البصلة مع الزبدة والملح و نخليوها ترخى شوية ثم
نضيف الكفتة و نشحروها مزيان و في الاخير نضيف المعدنوس و الكوزة و
سكينجبير و نحركو و نزولوهم من فوق النار
نديرو الزبيب في مقلة مع شوية القرفة و شوية سنيدة و نحركو شوية فوق النار
ثم نزولوه و نخلطوه مع اللوز و العناصر الاخرى ثم نعمرو البريوات و ندهنوهم
بالزبدة مخلطة مع الزيت و ندخلوهم للفران يطيبو و عند التقديم نزينوهم
بالقرفة والسكر او بالعسل مخلط مع القرفة و نقدموهم سخان بالصحة

بناشي بالفرماج :

1/2 حليب
2 قطع فرماج مربع
كاس يوغورت مسوس
كاس عصير البرتقال
سكر حسب الذوق
يخلط الكل في الخلاط و يقدم باردا.

عصير

2 بطاطس مسلوقات و مقشرات و مقطعات
.. خزوات
1 لتر لبن
1 لفاني
يوغورت بنان
1 قطعة فروماج مربع
سنيدة حسب الذوق

يخلط الكل في الخلاط الكهربائي و يقدم باردا

بطاطا سريعة التحضير

1 خزو محكوك
1 كرعة محكوكة
1 بصلة مشلدة
1 م ك زبدة
م سكين جبير خضر
2 ضرس ثومة
ملح ابزار سودانية
بيضة
راس م ص بيكاربونات صودا
4 بطاطا كبيرة محكوكين و معصرين من الماء مزيان

ناخدوا البصل نحمروه فالزبدة مع سكين جبير و الثوم
ثم نضيفه الكرعة و خزو و التوابل و نتركهم يتشحر
ثم نضيفو الخليط للبطاطا و البيضة و البيكاربونات
نخلطوهم مزيان و نعمروا بيهم كواغط الحلوة و نعملوا عليهم الفروماج و ندخلوهم للفرن متوسط 15 الى 20د

بطاطا معمرة في الفرن

المقادير

4 بطاطات كبار (من الاحسن تكون بيضا )
شوية جلبانة
2 خيزوات مقطعين مكعبات صغار
معدنوس مقطع
فرماج محكوك
صوص بيشاميل
بزار ملح
لاشابلير(تقريبا ثلاثة معالق كبار )

نغسلو البطاطا مزيان و نخليوها بقشورها ثم نلويوها في ورق الالمنيوم و نشويوها في الفران
ندخلو فيها السكين باش نشوفو واش دخلها الطياب و نخرجوها ما تطيبش بزاف
منين تكون البطاطا في الفران نصلقو خيزو و الجلبانة مع شوية الملح ثم نصفيوهم
نقسمو البطاطاعلى جوج و نخويوها شوية بملعقة صغيرة
نخلطو البطاطا اللي زولنا مع خيزو و الجلبانة و شوية الملح و البزار و
المعدنوس و صلصة البشاميل ونعمرو البطاطا ونرشوها بلاشابلير ثم نديرو فوقها
الفرماج محكوك و ندخلوها للفران غير يذوب الفرماج ويتدهب اللون ديالها
ونخرجوها ثم نقدموها بالصحة و الراحة كتجي غزالة خصوصا للعشاء

صبيعات بالكفتة و الخضر في الفرن

المقادير

رابعة كفتة
قزبر و معدنوس مقطعين
بزار سكين جبير ملح راس ملعقة صغيرة قزبر يابس مدقوق
رابعة بطاطا مقشرة و محكوكة رقيق و معصرة من الماء
رابعة خيزو مقشر ومحكوك رقيق و معصر
بصلة متوسطة محكوكة في الجهة الغليضة ومعصرة من الماء
بيضة
ربع كاس عنبة زيت مائدة

الطريقة

نخلطو كل المقادير اللي عندنا مزيان و نديرو منهم صبيعات او كويرات
ونديروهم في لاطة مدهونة بالزيت و ندخلوهم للفران يطيبو ثم نقدموهم بالصحة و
الراحة
هده المقادير كتعطي نصف كيلو
الا بغينا نديروهم طجين كناخدو الطجين نديرو فيه شوية زيت بلدية و نستفو
دوائر بصلة و مطيشة ونديرو فوقهم الكويرات ديال الكفتة و الخضر ونغطيوهم
بدوائر البصلة و مطيشة و نرشو من الفوق بالتوابل ونديروهم يطيبو على نار
مهيلة دون اضافة الماء و بالصحة والراحة

» اللقاء المفتوح
» كيك الموز من اللقاء المفتوح
» وصفات من اللقاء المفتوح