نصائح جديدة من عند السيدة لطيفة من المحمدية و ........

نصائح من عند السيدة لطيفة من المحمدية
اعطاء نكهات خاصة للاكل
*الرفيسة
الى بغينا نكهة الحلبة و ما بغيناهاش تكون مجهدة مانديروهاش في المرق ديال
الرفيسة و لكن نخليوها حتى الاخير منين نقطعو التريد او المسمن قبل
مانسقيوه نديروه يفور فالكسكاس و نديرو الحلبة فالماء اللي فالبرمة بهاد
الطريقة كيجي المسمن منسم بالحلبة واخا ماكايناش في المرق

*لاعطاء نكهة خاصة للسفة ديال الشعرية نديرو اعواد ديال القرفة في الماء اللي غدي تفور فيه

*لاعطاء نكهة للسفة ديال الروز نديرو فالماء اللي كيفور فيه الباديانة (النافع نجيمات)

*بالنسبة للشعرية الصينية نديرو ورقة سيدنا موسى

*الكسكسو نديرو معاه مزاود ديال الحار و نفوروهم معاه فالكسكاس و فينما
بغينا نرشو الكسكسو نزولوهم حتى نرشوه ثم نعاودو نديروهم وسط الكسكسو و
نرجعوه للكسكاس يفور

نصائح اليوم من عند السيدة مليكة

*الزيتون اسود منسم
باش يجينا الزيتون اسود منسم منين نرقدوه و يوجد و نشمشوه ندهنوه بالزيت البلدية و نرشوه بالنافع مطحون كيجي لذيذ و فيه نسمة زوينة

*الزيتون الاسود لدهن الخبز
نزولو ليه العظم و نطحنوه في الطحانة ديال العطرية مع الزيت البلدية و شوية النافع و نديروه في قرعة

*الزيتون اسود مشرمل
نزولو ليه العظم و نزيدو عليه المعدنوس مقطع و الثومة محكوكة رقيق و
الهريسة حسب الذوق و الزيت البلدية و الحامض مرقد نغسلوه مزيان من الملح و
نزولو ليه العظام و نقطعوه صغير و نخلطو كلشي مع الزيتون

*تعقيم القراعي ديال الزجاج
نغسلو القراعي مزيان و نمسحوهم ثم نديرو فيهم الماء طايب و الخل و ندوزوه
على القراعي كاملين من الداخل و حتى الغطايات ثم نقلبو القراعي و الغطايات
فوق شي منديل نقي و نخليوهم ينشفو مزيان بلا مانمسحوهم ثم نديرو فيهم
الحاجة اللي بغينا

*بديل المايونيز
ناخدو حك ديال ياغورت طبيعي مسوس و نزيدو عليه شوية ملح و ابزار و ملعقة
صغيرة زيت بلدية او زيت مائدة و نخلطو مزيان حتى نحصلو على صلصة بحال
المايونيز

**باش تبقى القهوة سخونة فالتيرموس مدة طويلة نعمرو التيرموس بالماء طايب و
نسدوه و نخليوه و منين توجد القهوة نخويو التيرموس من الماء و نديرو فيه
القهوة

**باش ماتفيضش لينا الطنجرة منين نسلقو الخضر ندهنوها من الداخل بالزبدة
نطلعوها على الجناب ثم نسلقو فيها الخضر كيطلع الماء حتى لحد الزبدة و يوقف

**منين تلصق لينا الحلوة فاللاطة ديال الفران نديرو اللاطة فوق البوطة على
نار مهيلة بزاف بحال الشمعة و منين تبدى تسخن نزولوها بشي حاجة غدي تقلع من
اللاطة بسهولة

نصائح من عند السيدة سميرة
الدرة المعلبة
ناخدو الدرة تكون باقية طرية ماتكونش الحبة ديالها يابسة و نديروها فقراعي
ديال الزجاج معقمة و نزيدو عليها الماء و شوية الملح و نسدو القراعي و
نديروهم فالكوكوت و منين تبدى تصفر الكوكوت نحسبو 10 دقائق و نطفيو عليها و
الى كانت الدرة قاصحة شوية نخليوها 15 دقيقة بعد الصفارة و نخليو الكوكوت
حتى تبرد عاد نحلوها و نحتفظ بها لحين الاستعمال

تجفيف اللفت المحفور
منين يكون اللفت محفور فالوقت ديالو ناخدو كمية كبيرة و نغسلوه مزيان و
نحكوه على شكل شرائح و نديروه ييبس مزيان فالشمس ثم نطحنوه حتى يولي غبرة و
نديروه فقريعة ديال الزجاج و ننسمو بيه الاطباق ديالنا عوض اللفت محفور
طري

الاحتفاظ بالسفرجل او التفاح
نقيو السفرجل او التفاح و نخليوهم بالقشور ديالهم (او يمكن نقشروهم حسب
الرغبة) و نقطعوهم و نديروهم في طنجرة مع شوية الماء و سكر حسب الذوق و
قريصة ديال الملح و شوية القرفة و مازهر و ملعقة زيت بلدية و نخليوه يطيب
في طنجرة مفتوحة بلا ما نسدوها مع التحراك حتى يتشحر مزيان و ينشف من الماء
و يطيب مزيان بحال المربى ثم نخليوه يبرد و نديروه في المجمد و منين نبغيو
نخضرو بيه ناخدو الكمية اللي تكفينا و نزيدو عليه شوية السمن و شوية من
المرق ديال الطاجين اللي مطيبين و نديروه فوق النار حتى يسخن مزيان ثم
نحطوه مع طاجين اللحم او الدجاج
او يمكن منين نخرجوه من المجمد نخليوه يتطلق و نديروه كويرات و نفندوه
فاللوز مقلي و مهرمش او نديرو كل كويرة بين جوج انصاف ديال الكركاع و نزينو
بيه الطبق ديالنا
طبعا نطيبو كل نوع بوحدو اما سفرجل او تفاح

للحصول على قوالب للشمع نحتفظ بالحكاك ديال الياغورت اللي كيعجبنا الشكل ديالهم و ندوبو الشمع فوق النار غير يدوب نزولوه ما نخليوهش يغلي و ناخدو خيط ديال الشمع او خيط بحال السير و لكن ماشي ديال النيلو و نشمعوه ثم ندهنو الحكاك
بشوية زيت و نكبو الشمع مدوب و نديرو الوسط الخيط و نشدوه من الفوق بقراصة و نحطوها على الحاشية ديال الحك و منين يبدى الشمع يجمد ندخلوه للمجمد باش يجمد بسرعة و يمكن نعطرو الشمع بالخزامى او القرنفل او القرفة او الورد

باش تحك لينا البصلة بسهولة و ما تضيعش منين نقشروها كنخليو بحال الطربوش جهة النباتة و كنقبطو منو البصلة و نحكوها

المغارف ديال العود باش يبانو بحالا قدام منين نشريوهم نغسلوهم و نشفوهم و ندهنوهم بالزيت و نخليوهم يشربو مزيان كيوليو رطبين و كيولي اللون ديالهم مغلوق و عندهم طابع قديم

الى فورنا الكسكسو كثير نسقيو القياس اللي بغينا و الباقي نخليوه بلا ماندهنوه لا بسمن لا بزبدة و نفرشوه في ثوب نقي و نخليوه ييبس ثم نخزنوه مع طريف ديال الملحة الحية و منين نبغيوه نعاودو نطلعو فيه التفويرة غير المهم مايكونش مدهون بالزبدة او السمن باش ما يخسرش

الى بغينا نطيبو الحريرة بالزربة و كنا غدي نخرجو او نمشيو للخدمة نديرو القوام ديالها كله في الكوكوت بحال المعتاد و نسدو عليها و نحسبو 10 دقائق بعد الصفارة ثم نطفيو البوطة و نخليو الكوكوت مسدودة و فيها الصفارة و نغطيوها مزيان بشي بطانية و نخليوها و منين نرجعو نحلو الكوكوت و غدي نلقاو كلشي طايب

للحصول على الرايب او الجبن بطريقة تقليدية ناخدو الحليب ديال البقر و ندفيوه شوية فوق البوطة ثم نغطيوه و نخليوه يروب كيحتاج تقريبا من 6 الى 7 ساعات و الى بغينا الرايب حلو نزيدو شوية السكر مع الحليب فالاول و الى بغينا الجبن لدهن الخبز او لحشو البريوات منين يوجد الرايب نصفيوه مزيان في زيف نقي و غدي نحصلو على الجبن

*باش تولي اواني الفضة كتبري نحكوها بالجيكس ناشف و نديرو معاه شوية الملحة كتولي بحالا جديدة

*باش مايتبدلش المذاق ديال القهوة فالتيرموس منين نساليو من القهوة نعمرو
التيرموس بالماء طايب و نخليوه شوية ثم نخويوه و نديرو فيه عود ديال القرفة
او القرنفل و نسدوه و نخليوه

*التيرموس ديال الحليب منين نغسلوه نعمروه بالماء طايب و نخليوه شوية ثم
نكبو الماء و نديرو كموسة ديال الفورص وسط التيرموس و نسدوه باحكام و
نخليوه

*باش نوجدو القهوة و حليب بسرعة عوض مانديرو الماء في الكوكوت ديال القهوة نديرو الحليب و الفوق فالصفاية نديرو القهوة و نسدو

*باش تكون عندنا الشيبة على طول العام منين نشريوها ننقيوها و نغسلوها
بالماء بارد ثم نديروها تغلي مع الماء و منين تطلق فيه نزولوه و نخليوه
يبرد ثم نديرو الماء في قوالب الثلج و نديروهم في المجمد و فينما بغينا
اتاي بالشيبة ندبرو مكعب ديال ماء الشيبة و سط البراد

*باش تكون عندنا ريحة زوينة في المنزل نحكو الاوراق ديال النباتات الاصطناعية اللي عندنا بالمسك و مرة مرة نرشوهم بمعطر الجو

*لازالة البرودة و الروائح من الحمام نديرو طريفات ديال الفاخر فالحمام و حتى في البلاكارات

*البلاطوات اللي كنشريو فيهم الاكل من السيبيرمارشي يمكن نستعملوهم للتزيين
منين نساليو منهم نصبغوهم واخا غير بالصباغة ديال الاظافر و نديرو فيهم
الورد او الخزامى منهم زينة و منهم رائحة زوينة في المنزل

*و بالنسبة للشبكات اللي كنشريو فيهم الخضر او اي منتوجات نديرو فيهم
الثومة او اوراق سيدنا موسى او ضامات البنة و نعلقوهم فالكوزينة منهم زينة و
منهم مايتلفوش لينا

نصيحة من الأخت نجاة هرهورة

الحوايج إلى طلقو لينا فبعضياتهم نعمل طنجرة فيها الماء وأوراق الرند ـ
يعني ورقة سيدنا موسى ـ ونعملو طنجرة تغلى ونضيف عليها الحوايج
لي طلقو لينا ونخليوها تغلى 15د ونزلو طنجرة من فوق النار حتى
يبرد الماء عاد نحيدو الحوايج ونشللوهم قالت كيخرجو كيشعلو مكيبقى
فيهم والو

الى بغينا نحتافضو بالقوق لمدة طويل

نقيوه مزيان نوضعوه في الما فيه الحامض حين نكملو تنقية ديالو نصلقو في الما معلقة فورص والحامض معصر ثم نصفيه نوضعو في كونجلاتور

خرشوف الى بغينا نحتافضو به لمدة طويلة

نقيوه نصلقوه مع الحامض والملح والماء يكون بزايد _منين يتصلق ناخدو قراعي
زاج معقمين ثم نوضعو الخرشف في لقراعي مع الما ديالو نغلقو لقراعي
نوضعوهم في لكوكوط مع لما باش يتعقمو نحيدوه من لكوكوط حين ببرد نوضعوه في
بلاكار راه ما كاي خسرش

دائما متميزة جزاك الله خيرا وسدد خطاك .

» السمك مشوي ـ السيدة زهرة من إيطاليا
» أغاني لطيفة رأفت
» عصير الأنناس والبرتقال واسكينجبير الطري ـ حورية من المحمدية