العيد قرب بأذن الله فراسكم ولا لا؟؟

العيد قرب بأذن الله

فراسكم ولا لا؟؟

العيد قرب بأذن الله فراسكم ولا لا؟؟ 151910sadbnm0102

اوا اش وجدتو ليه

هادشي اللي بغينا فهاد الموضوع بغينا نهضرو على تحضيرات العيد الكبير

1 شنو الماعن اللي كتشري (الشواية متلا القطبان المجمر المهم الماعن اللي خيصهم يتشراو خاصة بالنسبة للعريسات اللي معندهمش هاد الماعن حيت عاد اول عيد غيدوزوه مع رجالاتهم)

2 شنو العطرية والشي لاخر ديال الطياب اللي كتشري (المشمش يابس متلا البرقوق الزعفران شعرة ...المهم يعني شنو اللي كيتحتاج فهاد العيد )

3 شنو التخمال اللي كديري

4 شنو الحلوة اللي غتصاوبي

5 حطي لنا شي وصفة زوينة نوجدوها فهاد العيد الحمد لله كيكون الخير موجود خاصنا نبدعو فيه ماشي كل نهار المرقة المرقة المرقة لا غطلع فالراس

اه ونسيت حاجة خرا خاصنا نهضرو عليها تهي
العراضات وما ادراك ما العراضات
الحمد لله فالعيد كنعرضو على الحباب وكيعرضو علينا خاصنا نحمرو الوجه
شنو كديرو فالعرضات وشنو افكاركم

موضوع روعة شكرا لك أختي

بالنسبة للعطرية كنضن خاص
سكين جبير
الخرقوم
البزار
التحميرة
الكمون
القرفة عواد
القزبر ياس
الزعفران شعرة والمسكة الحرة

هـاد العطريـــة كلهــا تتشرى و تتنقــــى,و تسخـــن شويـــة قبل مـا تدق في المهـــراز ولا الطحانة ,و دوز في الغربال الرقيق, ثم تتخـزن في قرعـــة ديال الزجــاج محكمــة الاغلاق باش تحـافــظ علــى النكهــة ديال كـــل عنـــصر.

كـاين النـــاس ال تيزيدو بعــض الأعشاب المنسمــة,بحـــال: ورقــة سيدنــأ موسى,أزيـــر ,الزعتـــر,زعيتـــرة,الثوم لقصبـــي,الحبـــق,النعنـــاع يابس,الكوزة,القرنفل و
اللويزة نشربها مع بولفاف اه و قعقلــة ,بسسبيسة,راس الحــانوت,المروزيـــة,المعدنوس يابس مـازال شي حـاجــة؟؟؟؟؟؟؟؟؟؟

العطرية

السمن

الزبيب
والخضر بالدرجة الاولى كتحتاج البصلة ومطيشة والربيع والتومة

شري البصلة كتيرة وخليها ومطشة ديريها محكوكة فالفريكو وخلي شي حاجة صاينة الربيع نقيه وغسليه ونشفيه وديريه فتوب فازك ماشي فميكة باش كيبقى خضر مكيصفارش وكتبقى فيه الريحة والتومة تاهي كتحتاج بزاف وشري العسل او صاوبيه باش تصاوبي المروزية ممممم

واللوز باش ترشيه عليها

شري ميكات بويض فاش ديري اللحم

قصميه على حسب القياس اللي غديري فالحطة باش الا جبدتي شي ميكة مدوبش لك فالاخر ديري غي نصها لاخر غيخسر دك الساع

وكتبي على كل ميكة شنو فيها حيت مني كيتلج دكشي مكتبقاي تعرفي من الكتف من الضلعة من المسارن خخخ

وخلي واحد الميكة عامرة يعني قصدت فيها اللحم كتير كدلك للحطة هدا خليه للضياف

وميكات فيهم لحم المروزية

ميكات لحم المرقة العادية

ميكات للكفتة

ميكات للدوارة

وميكة للراس والكرعين

كنخملو التلاجة

ندوزو للبيوت

نضربو لهم واحد التسييقة فاعلى تاركة ونصبنو اللي غيتصبن ما حد باقا شوية الشميسة
اوا ونشريو المجمر والقطبان والشواية والمواس ونمضيو المواس

و نشريو الفاخر

بعض النصائح للتحضير المسبق لليلة العيد
- ليلة العيد ان شاء الله وجدي كل شيء باش تنقصي عليك الخدمة ونهار العيد متلفيش.
دقي الثومة بالملح و عمريها في قرعة في الثلاجة.
- دقي الربيع مع الثوم و الكامون و التحميرة و الملح و السودانية و عمريها في قرعة كذلك.
-دقي القسبور حبوب واحتفظي به فعلبة.
جبدي الاواني لي غادي تحتاجي وخليها قريبة لك وفمتناول اليد.
- اما اللحم حتى لثاني يوم عيد عاد تبداي فيه حتى ينشف ويتعزف كيف كنقولو.
- وسبقي القسمة لي غادة تصدقي بيها للفقراء ان شاء الله والله يتقبل من الجميع.

البولفاف
تشوى الكبدة المرة الاولى حتى تحمر وتقطع شرائح طويلة ثم يقطع مربعات و تمزج الكمون مع الفلفلة حمراء و الملح ثم تخلط مع الكبدة. و تلف قطع الكبد بالشحم و توضع في القضبان و تشوى.
كاين لي مكيعجبوش بولفاف كيدير الكبدة مشرملة

الكبدة مشرملة
كبدة – قزبورو معدنوس - 4 فصوص ثوم - ملعقة صغيرة من الكمون -ملعقة صغيرة من التحميرة - ملح نصف كأس زيت الزيتون - نصف ليمونة مرقدة - نصف عصير حامضة - نصف كأس ماء.
تشوى الكبدة غير شوية باش يتحيد منها الدم ثم تقطع و تضاف لها التوابل وتترك في الثلاجة لمدة نص ساعة. بعد ذلك نسخن الزيت في المقلاة نضيف البصل ثم نضيف قطع الكبد ثم الماء

الطحال
نقطع القلب و الكلية و القليل من شحم الكلي نضيف ربطة بقدونس مقطعة و قشرة ليمونة مخللة و مقطعة (مصيير) نضيف ثوم مفروم- ملح - تحميرة - كمون –فلفلة حارة (شطة)شوية روز مسلوق نص سلقة. يملا الطحال بالحشوة جيدا. ثم نخيطه بالخيط و يدخل للفرن في الفرن حتى ينضج

المخ بالبيض
اول حاجة ناخد المخ نضعه يطبخ في الماء دقيقة و نزيل منه القشرة الرقيقة اللي فوق ناخد 2 حبات طماطم نقطعهم نضيف الثوم مفروم –قزبور- ملح – فلفلة حمراء - كمون – السودانية (فلفلة حارة) - زيت الزيتون - زيت نباتي.نضيف كاس ماء و نضيف الكل للمخ و يطبخ من الجهتين. و حين نضجه نضيف البيض من فوق.

الكفتة
طحني الكفتة مع بصيلة و ثومة و قسبور ومعدنوس و كامون و ابزار و تحميرة وممكن تزيدي واوراق النعناع شوية زعتر وخاص تكون شوية ميدومة الى كنت غادي تشويها اما الى كنتي غادي ديريها طاجين فنقصي من الشحمة باش متجيكش مزيتة وملي تكوني تشكليها قضبان باش تشويها تكون حداك زلافة فيها الماء ديال بصلة محكوكة ومطيشة تدهني بيهم يديك كيعطيوها لذة رائعة

كيفية غسل الدوارة ديال الخروف "معدة الخروف"
1ـ تغسل معدة الخروف جيدا ثم توضع في وعاء وسط الماء الغليان وتترك فوق النار مدة خمس دقائق، بعد ذلك تخرج وتكشط بالسكين لإزالة الطبقة السوداء،ثم تغسل من جديد وترقد قليلا في الماء مع الملح والحامض وتقطع أطرافا صغيرة.
2ـ تقلب الأمعاء (المصارن)"بواسطة مغرف خشبية". وتغسل جيدا ثم تعمل على شكل ظفيرة وتوضع في وعاء مع الرئة تكوني عمرتيها من القرجوطة بالماء و غسلتيها من الداخل و خويتيها.، وتشلل بالماء والملح والخل وتقطع أطرافاصغيرة.
3-ناخد الشحمة وننشرها فحبل تقطر شوية.اضافة الى كنت غادي ديري الكرداس ديري الملح للمصران من الداخل و عظم التمرة و بركي على بكل جهدك راه كيولي بحال الخيط ملي كيبس في الكرداس.

تقطيع الاضحية او التفصال
طبعا البلاستيكات المخصصة للحم خاص يكونو واجدين وهذي طريقة تنخلي الكتف صحيح باش نعمر ه ونفوره او نحمره.تتهبطي مع العمود الفقري عموديا. تتخذي الفيلي و الفوفيلي للقطبان خصوصا الشيوخ و الاطفال. تاخدي ايضا هبيرة من الرجلين (Jiggot). تتمشي للضلوع و تفصلي بيناتهم باش تاخدي الكوطليط. تخلي ضليعات للتفوار و للكسكس كتاخدي شوية من القدام للقديد. و كذلك هبيرات من الرجل. داك العمود الفقري باش تصايبي المروزية و تخلي فيه لحيمة ماشي تقدديه وتخلي غير العضيمات. وانت تتقطعي الرجلين يعني جيكويات عزلي الملج للطنجية و الطاجين و العظيمات للحريرة. و اللحيمات للقطبان. ما تصغريش القطع باش يجيو باينين للضيوف لان الغنمي ملي تيطيب تيذوب ويصغر.عند الانتهاء ستفي اللحم في بلاطويات و دخليه للفريكو كل بلاطو اشنو فيه.يعني ديال الطاجين، ديال التفوار، ديال الكسكس..و حتى ديال القطبان سرحيه في بلاطو.. و دخليهم ملي يجمدوا جمعي كل شكل ديال بلاطوفي بلاستيكة كبيرة.وهكذا تربحي الوقت وتنظمي الفريزر ديالك. و لي عندها ليبواط كبار احسن.اما المروزية و القديد راه غادية تصايبيهم و ما ياخدش البلاصة او خليهم حتى توصلي لهم.
تناخذ (الف**ولات) ديال الحولي تندرهم بوحدهم حتى نطيبهم شي نهار بالبصلة - راس الحانوت - زيت زيتون – ثوم - الربيع وشوية ديال الزبيب والقرفة.
ما تنساش تكتب تيكيتات على بلاستيك للحم الشواء او الضلعة او الطياب او...و حين الاستعمال يكفي ان تقرأ الورقة باش تعرف نوع اللحم.

القطبان
نقطع اللحم مكعبات – البصلة مشلظة - كمون – تحميرة -معدنوس - قطرات من زيت زيتون - ملح. تترك ساعة ترقد و توضع في القضبان وتشوى

القديد
اللحم ديال القديد والقسبور يابس مدقوق وكامون ملح شوية كثييرة وزيت يترقد ليلة كاملة وينشر فحبل حتى ييبس.يتشمش مزيان.

بالطبع التخمال و تحضير الحلويات و الكيك و الرغيفات الخاصين بالفطور

* ناخد العطرية و ندقها على يدي و ناخد المرو زية و المساخن و الحامض مصير

* نشري المشماش و الزبيب و البرقو ق و اللوز و الزيتون و الخضر و اكثر من البصل

* نعجن مسبقا خبيزات بالنافع و الجنلان

و نستعد ليوم العيد ان شاء الله .

التقلية

المقاديــــــــــــــر

الكرشة+ المصارين+ الرئة
الثوم مدقوق
الكزبرة+المعدنوس (قطعين إلى قطع صغيرة)

قليل من :الملح
الكمون
الفلفل الأحمر
الإبزار
الزيت

الطـــــــريقـــــة

نأخذ قطع الكرشة+ المصارين+ الرئة
نضعها في الماء الغليان مع قليل من الملح و نتركها تغلي جيدا
ثم نصفيها من الماء

نأخذ طنجرة و نضع فيها العناصر كلها مع التوابل المذكورة أعلاه و قليل من الزيت كذلك
و نتركها (تتشحر) جيدا مع التحريك من حين لآخر
ثم نضيف الماء و نتركها تنضج على نار متوسطة

الله يعطيكم الصحة اخواتي ويرزقكم ماتمنيتو وشكرا على هدا الحماس الكبير هاكدا نبغيكوم

» الزيت العجيب لتكبير المؤخرة
» خلطات طبيعية لشعر رائع في العيد
» ابدأ صفحة جديدة مع الله.. في خير أيّام الله..خطتك: