الجبن التركي

نبداو بالمقادير على بركة الله :

3 لتر ديال الحليب
2 فصوص ديال الثوم
الخل ديال الحامض
الملح



كنديرو الحليب فشي طنجرة كبيرة شوية , و نزيدوا عليه الملح و الفصوص ديال الثوم بعدما قشرناهم و نحطوهوم على نار مجهدة حتى يبدا يغلي الحليب



مللي يغلي الحليب و نتأكدو منو نزيدوا عليه 6 ملاعق ديال الخل ( 2 ملاعق لكل لتر ) , و فنفس الوقت ندوروا بشي ملعقة خشبية تكون ثقيلة حيث تيلصق فالطنجرة



غادي يبدا يبان لينا الجبن بدا كيتكون الفوق و كيختار نبقاو ندوروا و نحركوا حتى يختار لينا مزيان و يثقال



من بعد ندوزوه يتصفى فشي فوطة نقية و غليضة شوبة و نخليوه يتسقطر مزيان , و ما تنساوش ترميوا دوك 2 ثومات



مللي كينشف الجبن مزيان , كنوجدوا ليه مقادير الترقاد ديالو :

الملح
زيت الزيتون
الزعتر
les herbes de provences
شوية ديال الفلفلة السودانية نااشفة
و قرعة ديال الزجاج فاش نديرو الخليط تكون نقية مزياان و ناشفة باش ما يفسدش فيها الجبن



كناخذوا الكرة ديال الجبن و نقطعوها مكعبات متوسطة , و نحطوها فالقرعة ديال الزجاج و نضيفوا عليها المقادير اللي ذكرنا الفوق و نخلطوا بشوييية باش ما يتعجبنش الجبن , و هاهو واجد بنييين و لذيذ و يبقى حتى اسبوعين فالثلاجة