ركن خاص بكـــــــل نصائـــــح اللــقــــــاء المفتـــــــــــوح

هنا ان شاء الله
تعالى سنقوم بتجميع النصائح التي تدرج في البرنامج الناجح اللقاء المفتوح

مرحبا بمشاركات الجميع و سيثبت الموضوع حتى تعم الفائدة

اتمنى تفاعلكن اخواتي

صائح من

عن السيدة السعدية من اسفي
*الرشاشة ديال الحمام منين كتسد و كيتجمع فيها الكالكير ناخدو كاس ديال
الخل و نزيدو عليه نصف لتر ماء و نديروهم فوق النار و منين يغلي الخليط
مزيان نزولوه من فوق النار و نحطو فيه الرشاشة و نخليوها مدة 5 دقائق كتسرح
و تولي تكب الماء بحال الاول

*الطنجرة ايلا تحرقات لينا نديرو فيها الماء و الملح و نغليوهم فوق النار
ثم تنظف بسهولة

*منين يقدام الكيس ديال الحمام نستعملوه لحكان الاواني ديال الالمنيوم
نفزكوه بالماء و نديرو فيه شوية الخميرة معجونة و الصابون البلدي و ندوزو
على الاواني بعدما نفزكوهم شوية كنحكو غير بشوية و كيخرجو المواعن بلا
مجهود

*الملابس ديال الصوف اللي مخدومة باليد منين تضياق علينا نحلوها و نلويو
الصوفة على يدينا (من المرفق لليد)ثم نفوروها فالكسكاس و نخليوها تنشف ثم
نديروها على شكل كبة و نخدموها مرة اخرى كتولي بحالا جديدة

*باش ماتبقاش ريحة الصباغة فالدار بعدما نصبغو ناخدو بانيو او سطل نديرو
فيه بصلة مقطعة بقشورها و نحطوه في المكان اللي فيه الريحة كتزول تماما

*الثقوب اللي كيكونو في الحائط نسدوهم بمعجون الاسنان ما كتبقاش تبان
نهائيا

نصائح من عند السيدة حميدة من تطوان
الجزء الاول
*لتنظيف الٲلبسة ديال الدان (اي لون) ناخدو ممحاة (ڭومة) نحكو بيها البقع
حتى تزول ثم ناخدو شيتة خاصة بالثوب ديال المليفة و الدان
( كتباع عند المحلات الخاصة) و ندوزوها عليهم كتزول الخملة كاملة منهم

*باش نحافظو على ليبوط (les bottes) و ببقاو مزيانين و شادين الفورمة
ديالهم منين نبغيو نخزنوهم ناخدو قرعة طويلة و نغطيوها بليبة او تقشيرة و
نديروها فيهم الراس ديال القرعة يكون التحت و نعمرو الفم ديالهم بالتقاشر
القدام او قطع ورق

* لإزالة الطبايع ديال الشمع من الملابس ناخدو موس ماضي مزيان و نزولو
البقع ديال الشمع ثم نديرو كاغيط خفيف واحد تحت البقعة و واحد الفوق و
نديرو عليهم المصلوح سخون و نحددو

*1 باش نحافظو على اصفر البيض
بعدما نعزلوه عن البياض نديروه في زلافة و نحطوها فوق طبسيل فيه الماء و
مكعبات ثلج و لكن فقط لمدة 3 ساعات لانه بعد ذلك كيولي فيه ضرر على الصحة
*2 باش مايتحلش لينا الدجاج و يبقى محافظ على الشكل ديالو منين نحمروه:
نغسلوه و نديرو ليه الشرمولة العادية و نديروه فوق النار يتقلى شوية من 2
الى 3 دقائق باش يشرب الشرمولة ثم نديروه في طبسيل و ندهنوه مزيان من
الفوق و بين الجلدة واللحم بملعقة كبيرة موطارد مخلطة مع السمن و ندخلوه
للفران يتحمر و مرة مرة نحلو الفران و نهزو المريقة اللي غدي يطلق و
نكبوها عليه بالملعقة و نحمروه من جميع الجهات مع سقيه بالمرق ديالو مرة
مرة بهذه الطريقة كتبقى الجلدة ديالو صاينة و كيجي زوين فالمنظر
و بالنسبة للشرمولة اللي بقات فالطنجرة نزيدو عليها البصلة مشلضة و
القشيوشات مقطعين و الزيت و نخليوهم يطيبو و تختار المرقة و توقف
*3 باش مايكحالش لينا الفول منين نشرملوه نديرو معاه بصلة خضارية و
الثومة و ملعقة كمون و ملعقة قزبر يابس و شوية خرقوم و ملح و شوية معدنوس
مقطع و الزيت البلدية و حامضة طرية مقشرة نلوحوها صاينة معاه( و هذا هو
السر باش مايزراقش الفول) و نغطيوه بالماء و نسدو الكوكوت الى كان الفول
صغير كيحتاج من 10 الى 15 دقيقة نخليوه حتى يطيب و يوقف فليدام ديالو و
بالنسبة للحامضة كتدوب و ماكتبقاش تبان و الفول كيبقى اخضر
*4 لتعويض الفرماج الاحمر ناخدو فرماج مثلث او مربع او الفرماج المثلث
الاحمر و نديروه ييبس في المجمد ثم نحكوه فوق الكراتان بالحكاكة الغليضة
كيعطي منظر هائل للكراتان
*5 باش نعرفو العجائن مثل اللازانيا واش طابو نديروهم في ماء غليان مع
الملح و نخليوهم و منين يطلعو الفوق نعرفوهم طابو ثم نزولوهم و نديروهم
مباشرة في اناء فيه ماء بارد و مكعبات ثلج ثم نصفيوهم من الماء و نحطوهم
فوق فوطة ثم نديروهم فالكراتان. اللازانيا ديال الدار كتاخد وقت اقل
فالطياب من اللي كتباع فالسوق

تبارك الله عليكم نصائح رائع جدا جزاكم الله كل خير
وجعله في موازين حسناتكم
Laughing

تبارك الله عليكم

تبارك الله عليك اختي

هذه بعض النصائح الخاصة بالسيدات والمطبخ
)
1 الى تحرق ليك الغداء او العشاء = كتديري الماء على حد الحراق+الخل شى
نصف كاس او اكتر حسب الحراق وتغليه مزيان تم تغسليها غير بالبونجة دغيا
كيزول الحراق.
2)الى جبدتى اللحم او الدجاج من المجمد ومابقش الحال يدوب
التلج =كديريه فشى حاجة وتكبى عليه الماء بارد من التلاجة والملح شى 10حى
15دقيقة غتلقاي اللحم تطلق من التلج.
3)باش نلصقو البريوات=معلقة و نصف
كبار الطحين+كاس الماء الكل فوق النار حتى يعقاد وتيلصق البريوات مزيان
4)التوم=
كنفورو التوم بالقشرة فى الكسكاس تم نخدو غير عجين الثوم نمعكوه بالفورشيط
مع شوية الملح مزيان ومنى يبرد نديروها فى قرعة الزجاج ونكبو من الفوق
معلقة الزيت ونديروها فى التلاجة كتبقى اطول مدة انا باقى عندى من العيد
الكبيير
5) اوراق الفجل تفور وتطهى متل البقولة تماما وكدلك اوراق
الباربا
6) الزعيترة مع الزيت الزيتون فهى تنسمه وتعمل فى
السلاطات...............
7) الخل=نصخنه بلا ما يغلى ونوضعو فيه شوية
الزعيترة ونحطوه فى قرعة وتقفل جيدا ونتركها فى الشمس مدة اسبوع او اكتر
وتصفى من الزعيترة او تبقى فيه
ناخد الطون بالزيت ديالو فى الخلاط +الزعيترة ويخلط حتى يصبح
متل البوماد يخلط به الخضر عوض المايونيز
9) الزعيترة +جبن+زيت
الزيتون يخلط مزيان ويحط فى الفطور.

تبارك الله عليك وعلى حداكتك الله يعطيك الصحة

سمسمة كتب:: تبارك الله عليك وعلى حداكتك الله يعطيك الصحة

ركن خاص بكـــــــل نصائـــــح اللــقــــــاء المفتـــــــــــوح %D8%B4%D9%83%D8%B1%D8%A7-%D9%84%D9%83

تبارك الله عليك وعلى لحداك ديالك

تبارك الله على المغربيات كل نهاار نتعلم منهم الجديد

جززززااااك الله خيرا وننتضر جديدك

نصائح من عند السيدة الغالية من اسفي

*الى كانت عندنا اباجور عندها الغشا ديال الثوب نصبغو المصباح ديالها اللي
كيضوي
(l'ampoule) باي لون مغلوق مثل الاحمر او الاخضر منين كتشعل كتعطي لون زوين

*باش ما يدمعوش العينين اثناء تقطيع البصل نديرو البصلة في الماء دافي و
نخليوها شوية عاد نقشروها و نغسلوها بالماء البارد ثم نستعملوها

*باش نزولو الغبرة من التلفزة و خصوصا ليباف نستعملو السيشوار

*الى شكينا ان الحليب اللي عندنا خاسر مانفيضوهش كامل نديرو غير شوية في
ملعقة و نجربوه فوق البوطة

*في بعض الاحيان كيتخلط لينا الدواء و ماكانبقاوش عارفين ديال من و لاش
كيصلاح باش نتفاداو هاد المشكل ناخدو ورقة و نكتبو عليها اسم صاحب الدواء و
التاريخ و لاش كيصلاح الدوا و نديروها معاه و يمكن نلصقوها عليه

*الى سالات الحجرة ديال الراديو نضربوها شوية بشي حاجة و نستعملوها غدي
تعاود تخدم

نصائح من عند الاخت كريمة

*باش يكون عندنا الشكلاط ديما موجود لتزيين الكيك و الطورطات ناخدو لوح
ديال الشكلاط و نديروه في المجمد حتى يقصاح مزيان ثم نحكوه في الحكاكة و
نديروه في بلاستيكات و نحتفظ به في المجمد فينما بغيناه نلقاوه موجود

*للاحتفاظ بالفواكه الجافة مثل الزبيب و البرقوق يابس و المشماش يابس
نديروهم في قرعة كتسد مزيان (القراعي الخاصين بالترقاد اللي فيهم الكاواتشو
فالسدادة ديالهم) و نكبو عليهم عصير برتقال او اي عصير او مشروب عندنا و
نديرو القرعة فالثلاجة و وقتما بغينا نزينو شي طورطة او حلوى نلقاوهم
واجدين

*البطاطا فريت باش تجي زوينة و لذيذة منين نقطعوها نرقدوها في الماء و الخل
عاد نقليوها

*بالنسبة اللي فيه الفواقة يدير طوبة سكر في الفم ديالو و غدي تزول

*باش نبوكليو الشعر للبنيتات الصغار بعدما نغسلو الشعر نضفروه كله و هو
فازك ثم نشفوه مزيان بالسيشوار و من بعد نحلو الضفيرات و غدي يولي الشعر
بوكلي بلا كوافورة

النصائح من عند شريفة من الرباط

1) باش نزولو المداد على اليدين نحكوهم بمطيشة مزيان

2) الزربية الى اللون ديالها تبدل تنرشوها بماء معدنى ونخليوها 10 د
ونشطبوها على شكل دائرى ومن بعد تشطب عادى ونديروها فى الشمس

3)الزربية الى طبعات بالمربى او القهوة نفزكو منديل بالماء ولالكول ونمسحو
مكلن الطبعة ونحكوه مزيان

4) الملابس الى كان فيهم الصدا تندهنوهم بعصير الحامض ونخليوه فيها ومن بعد
تغسل بصابون الحجرة

الى كان عندك الدباب فى المنزل تديري
كاسرونة فيها الماء مع الخزامة وتبقى تغلى راه ماتيبقاش

6) باش نحيدو رائحة الشواء من المنزل ملى نساليو الشواء نديرو طرف من قشرة
الحامض او البرتقال فى المجمر

7) طبايع ليدام فى الملابس ترشو بطالك ونفركوهم باليد بلا ماء من بعد
نغسلوهم بصابون الحجرة
نصائح اليوم من عند السيدة نتيجة من تمارة

*الشكلاط باللوز مكلي
نغسلو اللوز و نديروه في مقلة ثقيلة و نخليوه يتحمر بلا زيت على نار مهيلة
ثم نخليوه يبرد و نهرمشوه
ندوبو شكلاط اسود نوع مزيان في حمام مريم ثم نزيدو عليه اللوز مهرمش و
نخلطو و نسرحوه فوق ورق المنيوم او بلاستيك و نخليوه يبرد ثم نجمعوه حتى
نحتاجوه للحلوة او اي حاجة اخرى و يمكن نديروه في قوالب و منين يجمد نزولوه
و نحتفظ به فبلاستيكة الى حين الاستعمال

*منين نعصرو الحامض نحتفظ بالقشور في المجمد و منين نبغيو نديرو القشرة
ديال الحامض في حلوة او كيكة نجبدوهم و نحكوهم فالحكاكة الرقيقة و
نستعملوهم

*منين نسلقو الخضر لتحضير السلطة كنديرو معاها ضرس ثومة و شوية الملح و
منين تسلق نصفيوها من الماء و نستعملو ماء السلق فالطاجين او المرقة و ضرس
الثومة اللي صلقنا كنحكوه و نديروه مع صلصة السلطة كنخلطو شوية شوية ملح و
ابزار ابيض مع زيت بلدية و شوية خل و عصير حامض ثم نزيدو عليهم ضرس الثومة
مسلوق و محكوك و شوية معدنوس مقطع و نخلطو و نديروها مع الخضر اللي سلقنا

*ماء سلق البطاطا نستعملوه لتحضير البريوش مثلا نديرو شوية زبدة و شوية ملح
و خميرة معجونة و خمارة و نصف كاس سنيدة و الحليب و شوية من ماء سلق
البطاطا و نخلطو و نجمعو بالدقيق و نديروه على شكل بريوش

*ضامة البنة
باش نحصلو على ضامة البنة منين نبخرو اللحم او الدجاج او الحوت ناخدو الماء
اللي تبخرو فيه و نديروه في قوالب الثلج و نجمدوه ثم نحتفظ به في اكياس في
المجمد و نعزلو كل نوع بوحدو بالنسبة لضامة اللحم او الدجاج يمكن نديروها
فالحريرة او اشياء اخرى و بالنسبة لضامة الحوت نديروها في صلصة الحوت كتجي
زوينة بزاف

*منسم للساندويتش
ناخدو بصلة نقشروها و نقطعوها طريفات صغار و نشحروها فالزيت و الملح ثم
نزيدو عليها فلفلة خضرا و فلفلة حمرا مقطعين مكعبات صغار و نخليوهم يتشحرو
مزيان و منين يبردو نديروهم في بواطة فالثلاجة و منين نبغيو نديرو ساندويتش
للوليدات نديرو لحم او دجاج و نديرو عليه شوية البصلة و الفلفلة ثم فرماج و
يمكن نزيدو على البصلة و الفلفلة الثومة الى بغيناه فسندويتشات للكبار و
كيبقى صالح فالثلاجة لمدة 3 ايام

*السمن الحار
نغسلو الزبدة بلدية (باش يزول الحليب اللي فيها) و نخليوها جانبا
نديرو كاس ماء مع 2 معالق زعتر و نخليوه يغلي شوية و منين يبرد مزيان
نصفيوه
ناخدو الزبدة اللي عندنا نزيدو عليها الملح و الماء ديال الزعتر و نخدموها
مزيان باليد باش يدخل فيها ماء الزعتر ثم نديروها في قرعة ديال الزجاج و
نكبو عليها شوية ماء الزعتر الفوق و نسدوها و نخليوها مدة 40 يوم ثم نحلو
القرعة و نخويو الماء اللي فيها و غدي نلقاو السمن واجد للاستعمال

*بالنسبة للحلوة اللي كتلصق بالمربى و كتكون وحدة عادية و وحدة مثقوبة من
الوسط باش نحصلو على منظر زوين ناخدو مربى جاري و نخلطو شوية مع سيرو احمر و
شوية مع سيرو اخضر ثم نلصقو الحلوة باش نحصلو على لون اخضر و احمر و نزوقو
بشوية اللوز مقلي و مهرمش من الجناب

*بعض المرات منين كنوجدو حلوة الصابلي كيكون الدقيق خايب و كتفرتت لينا
العجينة و ماتبغيش تجمع في هذه الحالة ناخدو ابيض البيض (ماشي الاصفر) و
نخلطوه مع العجينة ثم نديرو الاشكال اللي بغينا

نصائح من عند الحاجة رقية و السيدة
مليكة من ازرو

ترقاد الحامض
ناخدو كيلو حامض او اكثر من النوع الغليض و نديروه في اناء و نكبو عليه
الماء سخون مزيان و نغطيوه و نخليوه يبرد ثم ننشفوه و نشقوه و نعمروه
بالملح و نديروه في قرعة و ناخدو صريرة نديرو فيها شوية الزعتر و 3 او 4
حبات من عود النوار (القرنفل) و 2 وريقات من الورد البلدي و نديروها فوق
الحامض و نديرو بلاستيكة بيضاء و نسدو القرعة مزيان و نقلبوها على فمها و
نخليوها يومين حتى لاسبوع عاد نحطوها عادية هاد الطريقة كنديروها باش
ماينشفش الحامض اللي الفوق و يخسر

*المسكة منين تلصق فالملابس ناخدو شوية زبدة و ندهنو بيها الظهر اللي
مافيهش المسكة و نلويوها و نديروها فالثلاجة ثم نخرجوها و نكرطوها بسهولة

*لتصبين ملابس الصوف بحال الهيدورة او سلهام او جلابة او عباية نفزكوهم و
نديرو ليهم الصابون و ناخدو واحد الشطبة تسمى تيغيغشت (تباع عند العطار) و
ننقيوها من العويدات و نخبطو بيها ملابس الصوف كتطلق الرغوة مزيان و كتخرج
نقية و اللون الابيض صافي

نصائح السيدة مليكة من ازرو

*المجوهرات ديال البلاكي اور « plaqué or » كتطلق الكحولة فالعنق او اليد
منين كنعرقو لتفادي هذا المشكل منين نشريوها ندهنوها بلاباز ( الصباغة اللي
كيكون لونها شفاف) بالنسبة للكورميط و الخاتم ندهنوهم من الجهة الدخلانية و
السنسلة ندهنوها كاملة و منين تزول لاباز و تقشر نعاودو نفس العملية

*المسكة فالحوايج نحكو عليها قطعة ثلج او الى كنا مزروبين ندخلوها للمجمد و
منين تجمد نزولوها بالموس بسهولة

*لتنظيف الجلدة ديال باب الثلاجة ندهنوها كاملة من الفوق للتحت بمعجون
الاسنان و نخليوها من 2 الى 3 دقائق و ناخدو شيتة ديال الاسنان (خاصة بهذا
الغرض) و نبقاو نحكو بيها ثم نمسحو بزيف فازك و نعاودو بزيف ناشف بهذه
الطريقة كتولي الجلدة نظيفة و كتبقى ريحة زوينة فالثلاجة

*الجلدة ديال الكوكوت مع الاستعمال كتشقق و تولي الكوكوت تتنفس باش نتفاداو
هذا المشكل منين تكون الجلدة جديدة قبل مانركبوها ندهنوها بالزبدة و
نخليوها ليلة كاملة و في الغذ نركبوها فالغطاية ديال الكوكوت كتبقى مزيانة
مدة طويلة و ماكتنفسش الكوكوت

*السفة ديال الشعرية باش يجي فيها لون زوين و مذاق رائع عوض الماء نرشوها
بالحليب فجوج التفويرات الاخيرة

نصائح من عند الحاجة رقية من اموزار

1) الزيتون مشرمل
2 كيلو الزيتون او اكتر نديروه فى بيدون مع الملح فقط ونسدو عليه ونحركوه
مرة مرة حتى يطيب نغسلوه ونسقطروه
فى طنجرة نديرو ربطة المعدنوس +2 ضروس التوم+1 م ص الكامون+2 م تحميرة+شوية
الزعتر+القزبر حبوب مهرمش شوية+1 م ص الملح+كاس كبير الماء+كاس كبير زيت
المائدة حتى يغلى مزيان نزولو المعدنوس نديرو الزيتون فى قرعة ونصبو عليه
الشرمولة والهريسة حسب كل واحدة او الاستغناء عنها
وحامضة مقطعة دوائر بلا زريعة هتا تنديرو الحامض على شكل طبقات اى الزيتون
تم الحامض تم الزيتون وهكدا تقفل القرعة وتفلب على فمها تبقى 4 ايام او
اسبوع حتى تصبح صالحة للاستهلاك

ترقاد الفلفلة

كيلو الفلفلة حمرا او اكتر نغسلوها وتسقطر مزيان ونفوروها فى الكسكاس مع
ربطة المعدنوس +راس التومة صحيح ملى تفور وتبرد نحيدو ليها الزريعة والقشرة
نديروها فى الخلاط مع التومة اللى تفورات غير تنمعسوها والمعدنوس
وكاس كبير الزيت الرومية +1 م ك الكامون +الملح+الزعتر+حامضة مصيرة نخلطوهم
مزيان ونصبوهم فى طنجرة على نار مهيلة حتى تنشف تماما او تدخل للفرن
ونديروها فى قرعة هى صالحة مع العدس او الحوت او شرمولة ديال الملاوي
.................
كيف يمكن تنسم بالفلفلة حارة ملى تنفوروها

3) الى كنا مزروبين وجبدنا اللحم او اى شئ من المجمد تنديرو ليه غير الملح
ونخليوه واحد شوية فهو تيطلق واخة كيبقى فى البلاستيك

) التومة الحمرا او البيضا كتفرك شوية باش نزلو منها القشرة والنباتة ومن
بعد نهرمشوها فى المهراز مع الملح
نديروها فى طبسيل مفرش بطرف التوب او ورق ابيض وتشمش حتى تنشف وتطحن فى
الخلاط وتغربل وتنديروها فى قرعة

5) تنفورو التومة ولما تبرد تنعصروها فى قرعة ونضيفو الزيت حسب كمية التوم
وقبصة الملحة نحركوها ونسدوها

6) التومة الى كانت كتيرة نديروها فى بلاستيك ونخبيوها فى المجمد كتبقى طول
العام

نصائح اليوم من عند السيدة مليكة

*الزيتون اسود منسم
باش يجينا الزيتون اسود منسم منين نرقدوه و يوجد و نشمشوه ندهنوه بالزيت
البلدية و نرشوه بالنافع مطحون كيجي لذيذ و فيه نسمة زوينة

*الزيتون الاسود لدهن الخبز
نزولو ليه العظم و نطحنوه في الطحانة ديال العطرية مع الزيت البلدية و شوية
النافع و نديروه في قرعة

*الزيتون اسود مشرمل
نزولو ليه العظم و نزيدو عليه المعدنوس مقطع و الثومة محكوكة رقيق و
الهريسة حسب الذوق و الزيت البلدية و الحامض مرقد نغسلوه مزيان من الملح و
نزولو ليه العظام و نقطعوه صغير و نخلطو كلشي مع الزيتون

*تعقيم القراعي ديال الزجاج
نغسلو القراعي مزيان و نمسحوهم ثم نديرو فيهم الماء طايب و الخل و ندوزوه
على القراعي كاملين من الداخل و حتى الغطايات ثم نقلبو القراعي و الغطايات
فوق شي منديل نقي و نخليوهم ينشفو مزيان بلا مانمسحوهم ثم نديرو فيهم
الحاجة اللي بغينا

*بديل المايونيز
ناخدو حك ديال ياغورت طبيعي مسوس و نزيدو عليه شوية ملح و ابزار و ملعقة
صغيرة زيت بلدية او زيت مائدة و نخلطو مزيان حتى نحصلو على صلصة بحال
المايونيز

**باش تبقى القهوة سخونة فالتيرموس مدة طويلة نعمرو التيرموس بالماء طايب و
نسدوه و نخليوه و منين توجد القهوة نخويو التيرموس من الماء و نديرو فيه
القهوة

**باش ماتفيضش لينا الطنجرة منين نسلقو الخضر ندهنوها من الداخل بالزبدة
نطلعوها على الجناب ثم نسلقو فيها الخضر كيطلع الماء حتى لحد الزبدة و يوقف

**منين تلصق لينا الحلوة فاللاطة ديال الفران نديرو اللاطة فوق البوطة على
نار مهيلة بزاف بحال الشمعة و منين تبدى تسخن نزولوها بشي حاجة غدي تقلع من
اللاطة بسهولة

طريقة سهلة مجربة و
نتيجة هائلة لترطيب اليدين: لما نسالي الشغال نغسل اليدين مزيان ثم نعمل
الماساج بقليل من زيت الزيتون و الملحة ندلك شوية بحال الكوماج لمدة 5دقائق
ثم نغسل بالماء

dar 3ala akhor ...obyan lya lmghribyat homa li kay3arfo liha sob7an lah 3ala 7dagtkom tbark lah rbi y7jbkom mn l3in Wink

تبارك الله عليكم نصائح رائع

وجزااك الله خيرا وجعله في موازين حسناتك

ويحفظنا جميعا من العين والحسد