ركن اللقاء المفتوح خاص بالحلويات

تيراميسو
(عواطف من بلجيكا)
المقادير
بكية كبيرة من البيسكوي طويل اللي فيه السكر من جهة وحدة
4 بيضات (نفرقو الصفر على البياض)
1 فاني
4 معالق كبار سنيدة
علبة جبن الماسكاربون ( mascarpone )
3 معالق كبار كاكاو غبرة ( أو نيسكافي) مخلطين مع ماء مغلي
التزيين
شكلاط الدهن و شوية زبدة
شكلاط فيرميسال
الطريقة
نطربو ابيض البيض بالباطور بحال الثلج
نطربو اصفر البيض مع سنيدة و الفاني مزيان
نزيدو الجبن شوية بشوية على ابيض البيض و نخلطو ثم نزيدو عليهم خليط اصفر
البيض و نخلطو كلشي مزيان
ناخدو مول مربع ديال الزجاج و نبداو نغمسو البيسكوي بسرعة في السيرو ديال
الكاكاو أو نيسكافي و نستفوه فوق المول على شكل طبقة و ما نخليوش الفراغ
بين البيسكوي ثم نكبو طبقة ديال الجبن و نعاودو نستفو طبقة ديال البيسكوي
مغموس في الكاكاو أو القهوة و نديرو باقي خليط الجبن ثم ندوبو شكلاط الدهن
مع شوية الزبدة فوق حمام مريم و نكبوه فوق خليط الجبن و نسرحوه ثم ناخدو
فورشيت و نبداو نديرو خطوط من الفوق باش يتخلط لون الشكلاط مع لون الجبن و
يعطينا لون مرخم ثم نديرو الشكلاط فيرميسال من الفوق و نغطيو المول بورق
الالمنيوم و ندخلوه للمجمد ساعتين او 3 ساعات ثم يقطع و يقدم في صحون فردية

كيكة بالتفاح و البنان (لطيفة من القصر
الكبير)
المقادير
3 بيضات
2 بنانات
2 تفاحات
كاس عنبة سنيدة
نصف كاس عنبة زيت
2 كيسان عنبة و نصف دقيق
2 خمارات
(او خمارة وحدة بيضا كبيرة ديال الشمال)
1 فاني
عصير نصف حامضة
التزيين
سنيدة
طحين
الطريقة
نقشرو التفاح و نقطعوه شرائح (بحال الهلال) و نديرو عليه عصير الحامض باش
ما يكحالش
نديرو البنان و البيض و السكر و الفاني و الزيت في الخلاط الكهربائي و
نخلطو مزيان ثم نديرو الخليط في اناء و نزيدو الدقيق و نخلطو و نزيدو
الخمارة و نخلطو مزيان ثم نديرو الخليط في مول داير مدهون بالزبدة و مرشوش
بالدقيق نبداو نهزو شرائح التفاح كل وحدة نديروها فالدقيق من الجهة اللي
غدي نحطو فوق الخليط و الجهة الفوقانية نديروها في سنيدة (يعني كل شريحة
تفاح غدي نحطوها من جهة فوق الطحين باش ما تنزلش اسفل الخليط و الجهة
الفوقانية نحطوها فوق سنيدة باش تتحمر و تعطي منظر زوين) و نستفو شرائح
التفاح فوق الخليط و ندخلو الكيكة للفران تطيب و تتحمر من الفوق حسب صاحبة
الوصفة كتجي غزالة و كيجي فيها من الداخل لون بحال وردي بفعل البنان

كلاص باللوز (عائشة من اكادير)
المقادير
4 بيضات
كاس صغير سكر كلاصي
قطرات من روح اللوز
بكية ديال لاكريم شانتيي غبرة
ربع لتر حليب بارد (كاس كبير)
100 غرام لوز مسلوق و مقشر و مقلي و مهرمش
الطريقة
نديرو اصفر البيض مع السكر كلاصي في اناء و نخلطو مزيان
نطلعو بياض البيض حتى يولي بحال الثلج
نطربو غبرة لاكريم مع الحليب بالباطور حتى تطلع لاكريم مزيان
نخلطو جميع العناصر في زلافة و نزيدو عليهم اللوز مهرمش و قطرات من روح
اللوز و نخلطو و نديرو الخليط في مول طويل و نخليوه ليلة كاملة في المجمد
ثم يقطع مورسويات او الى بغينا نقدموه للضياف نقلبوه في طبسيل طويل و يزين
حسب الذوق

ديسير على شكل سيكار (نجاة من هرهورة)
المقادير
رابعة لوز مسلوق و مفسخ و مقلي و مهرمش
رابعة تمر مزولين ليه العظم و مقطع صغير
125 غرام كركاع مصهد فالفران و مهرمش
ملعقة كبيرة زبدة
اصفر بيضة
شوية مسكة حرة و شوية قرفة و مازهر
رابعة ورقة البسطيلة
نصف لتر كريم فريش
عسل للسقي
كاس لوز مهرمش للتزيين (نقصوه من رابعة اللي عندنا)
زبدة مدوبة + زيت للدهن
الطريقة
نخلطو اللوز مع التمر و الكركاع و الزبدة و اصفر بيضة و القرفة و المسكة و
مازهر و نشكلوهم اصابع
نقطعو الورقة على اربعة و ندهنوها بخليط الزبدة و الزيت و نديرو في كل وحدة
اصبع ديال الحشوة و نلويو على شكل سيكار حتى نكملو و ندهنوهم بالزبدة و
الزيت و ندخلوهم للفران يطيبو و يتحمرو و مباشرة منين يخرجو من الفران و
هما سخان نسقيوهم بالعسل و نرشو عليهم اللوز مهرمش اللي نقصنا
نطربو لاكريم فريش مزيان حتى تطلع و تولي واقفة و نخليوها في الثلاجة الى
حين التقديم
منين نبغيو نقدمو الديسير نديرو لاكريم في زلافة غارقة ديال الزجاج و ناخدو
السيكارات و نوقفوهم بحال الشميعات و سط لاكريم و نقدموهم كيجيو لذاذ و
منظرهم زوين[

حلوى الصخرى

كيلو لروب كاوكاو محمر فى الفرن ومهرمش غيى شوية
350 غ كلاصي
4 ابيض البيض
1 فانى

نطربو ابيض البيض مع كلاصي وفانى مزيان حتى يطلع ونضيفو كوكاو شوية بشوية
بمعلقة العود حتى يكمل ندهنو الاطة بالزبدة والطحين وناخدو العجين بالملعقة
او رؤوس الاصابع ونحطوهم فى لاطة وتدخل للفرن

كيكة
بالليمون طايب (خديجة من البيضاء)
المقادير
برتقالة وحدة كبيرة
رابعة سنيدة
2 بيضات
كاس عنبة زيت
50 غرام كوك
200 غرام فورص
1 خمارة حلوى
قبصة ملح
الطريقة
نديرو الليمونة مع الماء في كسرونة فوق النار و نخليوها تطبخ ثم نصفيوها و
نعاودو نديرو ليها الماء و نخليوها تطبخ مرة اخرى حتى تولي رطبة ثم نقطعوها
بقشورها و نزولو ليها العظام و نطحنوها في الخلاط الكهربائي مع سنيدة ثم
نديرو الخليط في اناء و نزيدو البيض و الزيت و نخلطو بالضراب اليدوي ثم
نزيدو رشة ملح و الكوك و نخلطو و نزيدو الدقيق و اخيرا الخمارة و نديرو
الخليط في مول مدهون و ندخلوه للفران اللي سخنا من قبل و نخليو الكيكة تطيب
على نار مهيلة (كتحتاج من نصف ساعة الى 45 دقيقة) و منين تطيب الكيكة
نخرجوها و نخليوها تبرد شوية بينما وجدنا السيرو
السيرو
كاس كبير عصير برتقال
شوية سنيدة (حسب الذوق)
نديروهم فوق النار و نخليو الخليط يطبخ و يعقد شوية ثم نسقيو بيه الكيكة و
نخليوها تبرد ثم تقدم

طورطة
بالكريب و كريما الحامض

*مقادير الكريب
نصف لتر حليب
2 بيضات
220 غرام دقيق
1 فاني
قبصة ملح
ملعقة كبيرة زبدة (اختياري)
*الطريقة
نخلطو جميع العناصر بالضراب اليدوي و نخليو العجين يرتاح و نوجدو لاكريم
*مقادير كريما الحامض
2 بيضات
130 غرام سنيدة
50 غرام زبدة
عصير + قشرة 2 حامضات مح****ن
*الطريقة
نخلطو جميع العناصر و نديروهم فوق نار مهيلة مع التحريك بملعقة الخشب حتى
يعقد شوية الخليط و نزولوه من فوق النار
نبداو نطيبو الكريب و كل وحدة طيبناها نحطوها فوق طبسيل و ندهنوها بلاكريم و
نخليوها و منين تطيب الكريبة الاخرى نديروها فوق الاولى و ندهنوها حتى هي
بلاكريم و هكذا حى نكملو الكريب و لاكريم غدي تكون على شكل طبقات بحال
الطورطة و الكريبة الاخيرة ندهنوها مزيان من الفوق بلاكريم ثم ندخلوهم لفرن
مسخن من قبل و نخليوهم من 10 الى 15 غدي نشوفو الكريب بداو كيتنفخو ثم
نخرجو الطورطة و تقطع و تقدم كتجي لذيذة بزاف حسب صاحبة الوصفة

حلوى
بالشكلاط و لاكريم شانتيي Gâteau fondant au chocolat
المقادير
300 غرام شكلاط اسود نوع ممتاز
40 سنتيلتر قشدة طرية
70 غرام زبدة
الطريقة
ندوبو الشكلاط مع الزبدة في حمام مريم ثم نزولوه من فوق النار و نبقاو
نحركو بملعقة الخشب حتى يبرد الخليط مزيان
ناخدو لاكريم فريش اللي طلعناها بالباطور حتى تولي شانتيي و نزيدوها على
الشكلاط و نخلطو بشوية بملعقة الخشب من التحت للفوق ثم نديرو الخليط في مول
متوسط مفرشين ليه البلاستيك الغذائي و نخليو البلاستيك شايط من الجناب و
نقادو الوجه ديال الحلوى ثم نغطيوها بالبلاستيك و ندخلوها للثلاجة (ماشي
المجمد) على الاقل 4 ساعات و من الاحسن نخليو الحلوى تبات فالثلاجة و عند
التقديم تزين بالشانيي او اللوز مهرمش او حسب الذوق و تقدم كتجي بحال
الكلاص

غريبة
بالقوام من عند عزيزة من فاس

المقادير:

رابعة المركرين
4 بيضات
2 كيسان العنبة سكر
2 كيسان زيت
2 خمارات
فاني
كاس عنبة زريعة الكتان محمرة
كاس الكوك
كاس اللوز محمر ومقطع طريفات
كاس زنجلان محمر
كاس شكلاط فيرميسيل
قبيصة الملح
الطحين حسب الخليط

للتزيين:
خليط من السنيدة والكوك والفاني والفواكه المعسلة

الطريقة:
كنخلطو الزبدة مع السنيدة مزيان وكنضيفو الزيت والبيض وباقي المقادير
كنضيفو أخيرا الطحين والخمارات حتى الحصول على عجينة عادية ديال غريبة
ونديرو منها كويرات كنديروها فالخليط ديال التزيين ونبركو عليها بالمرشم
للي على شكل وردة ونحطو فالوسط قطعة ديال الفواكه المعسلة وندخلوها للفران
مكتاخدش الوقت بزاف وكطيب..

كلاص بلاكريم باتيسيير (حنان من اولاد
تايمة)
*مقادير لاكريم
نصف لتر حليب
2 اصفر البيض
3 ساشيات فاني
رشة ملح
سكر حسب الذوق
2 معالق كبار فورص مغربل
ملعقة كبيرة مايزينا
*الطريقة
نديرو الحليب فوق النار و منين يسخن نزيدو رشة ملح و السكر و الفاني و
نحركو مزيان ثم نبداو نغربلو الدقيق ثم مايزينا فوق الكسرونة مع التحريك
المستمرعلى نار مهيلة و منين يبدى يغلي الخليط نزيدو اصفر البيض مخلط شوية
بشوية مع التحريك بسرعة و نبقاو نحركو حتى يعقد الخليط ثم نزولوه من فوق
النار و نزيدو عليه الزبدة و تخلطو مزيان و منين تدفى لاكريم نديروها في
الثلاجة و نخليوها تبرد
*باقي المقادير
2 بياض البيض (اللي بقاو لينا)
رشة ملح
4 معالق كبار عسل
نطربو بياض البيض بحال الثلج مع رشة ملح و منين تبرد لاكريم باتيسيير نزيدو
عليها العسل و نخلطو و نزيدو بياض البيض و نقسمو الخليط على جوج و ننسمو
كل قسم بالنكهة اللي بغينا و يمكن نضاعفو المقادير الى بغينا نديرو 4 ديال
النكهات
*النكهات
*1 نكهة البرتقال
2 معالق كبار عصير البرتقال
قشرة البرتقال محكوكة
شوية روح البرتقال (اختياري)
نصف حك ديال ياغورت حامض أو ياغورت طبيعي مسوس
* 2 نكهة الحامض
2 معالق كبار عصير الحامض
قشرة الحامض محكوكة
روح الحامض (اختياري)
نصف حك ياغورت حامض أو ياغورت مسوس
*3 نكهة القهوة
2 معالق كبار نيسكافي مدوبة فشوية حليب أو ماء
نصف حك ديال ياغورت طبيعي مسوس
*4 نكهة الشكلاط
2 معالق كبار كاوبيل
نصف حك ياغورت طبيعي مسوس
حبيبات الشكلاط أو شكلاط مقطع طريفات صغار
*5 نكهة الفريز
2 معالق كبار عصير برتقال
نصف حك ياغورت مسوس
فريز مطحون مزيان بوحدو
*6 نكهة الخوخ
2 معالق كبار عصير برتقال
نصف حك ياغورت مسوس
خوخ مطحون مزيان بوحدو
و يمكن نديرو البتيخ او فاكهة الباباي بنفس الطريقة
هاد المقادير ديال لاكريم كنقسموهم على جوج و نديرو جوج نكهات و الى بغينا
نديرو اربعة نكهات نضاعفو مقادير لاكريم باتيسيير و منين نخلطوها مع العسل و
بياض البيض كنختارو النكهات اللي بغينا و نخلطو مقادير كل نكهة بوحدها و
نزيدوها على القسم ديال لاكريم و نخلطو و نديرو لاكلاص في علبة و ندخلوه
للمجمد حسب صاحبة الوصفة كيجي ما قاصحش كيجي لذيذ و كريمي بحال لاكلاص اللي
كيتباع

فلان
بالكوك (خديجة من الراشيدية)
المقادير
كاس كبير عصير برتقال
كاس كبير سنيدة
كاس كبير كوك
5 بيضات
الطريقة
ننقصو 3 معالق كبار سنيدة من الكاس اللي عندنا و نديروهم في كسرونة فوق نار
مهيلة (دون اضافة الماء) و نخليو السكر يدوب و يولي كراميل ثم نكبوه وهو
سخون في مول ديال الزاج (او قوالب فردية)
نخلطو البيض مع السكر و نطربو مزيان و نزيدو العصير و نخلطو ثم الكوك و
نخلطو كلشي مزيان و نكبو الخليط في مول و ندخلوه للفران يطيب على حمام مريم
و النار تكون مهيلة و منين تدوز 35 حتى 40 دقيقة نجربو بالسكين الى مالصق
فيه والو نعرفو الفلان طاب ثم نخرجوه من الفران و نخليوه يبرد مزيان ثم
يقلب في طبق و نقطعوه مربعات و نديروهم فالكويغطات الكبار ديال المادلين او
نقدموهم في اطباق فردية

غريبة اللوز (مريم من الرباط)
المقادير
نصف كيلو لوز مسلوق و مفسخ و مطحون مزيان بوحدو
رابعة سكر كلاصي
3 أصفر البيض + بيضة كاملة
خمارة حلوى
ملعقة كبيرة زبدة عادية
سكر كلاصي للتزيين
الطريقة
نخلطو اللوز مطحون مع السكر و البيض و الخمارة و الزبدة مزيان و نديرو
كويرات و نفندوهم فالسكر كلاصي مزيان من كل الجهات و نديروهم في لاطة
مدهونة و ندخلوهم لفران يكون سخون مزيان و نقصو العافية و نخليوهم يطيبو
على نار مهيلة حتى يتشققو (ما نطيبوش الحلوة بزاف باش ما تقصاحش)

انواع كرواصة بعجينة وحدة (فتيحة من
تارودانت)
المقادير
كيلو و نصف فورص ممتاز (من الاحسن ديال البكية)
2 بيضات
كاس عنبة زيت
كاس عنبة سنيدة
2 خمارات
شوية الملح
شوية خميرة معجونة
ماء دافي للعجن
التزين
اصفر البيض
شكلاط محكوك
زبدة
تفاح مقشر و مقطع دوائر
سميدة رقيقة
سكر كلاصي
سنيدة مخلطة مع الكوك
الطريقة
نعجنو جميع العناصر بالماء دافي و ندلكو مزيان فالاول تكون العجينة قاصحة و
نبقاو ندلكو و احنا كنزيدو شوية الماء حتى تطلق العجينة ثم نقسموها على
اربعة اجزاء
*الجزء الاول نخليوه عادي نديروه خبيزات و ندهنوهم بالصفر و نرشو بالجنجلان
*الجزء الثاني نطلقوه بالدلاك و نديرو عليه الشكلاط محكوك و نلويوه على شكل
رولو و ندهنو الوجه ديالو من الفوق و ندوزوه في سنيدة مخلطة مع الكوك و
نقطعوه بحال شكل فقاص
*الجزء الثالث نديروه كويرات و نطلقوهم و ندهنوهم بالزبدة و نطويوهم على
اربعة بحال الرغايف و نحطو دائرة تفاح و سط كل رغيفة و ندخلو القنات باربعة
ديال الرغيفة وسط دائرة التفاح و ندهنوهم باصفر البيض
*الجزء الرابع ديال العجينة نديروه على شكل خبيزات ونفندوهم فالسميدة رقيقة
و نقطعوهم من الفوق بالمقص نديرو فيهم بحال الثقيبة ونديرو وسط كل ثقيبة
مقدار حمصة ديال الزبدة
و نخليو الاشكال كلهم يخمرو ثم ندخلوهم للفران يطيبو و بالنسبة للرغايف
ديال التفاح منين يخرجو من الفران مباشرة نغبروهم بالسكر كلاصي من الفوق
حسب صاحبة الوصفة كيجيو رائعين و مختلفين

السفنج
فورص
شوية خميرة بلدية
شوية خميرة معجونة
شوية الملح
ماء دافي
نعجنو العناصر مزيان في الاول تكون العجينة قاصحة و ندلكوها مزيان احنا
كندلكو و كنزيدو الماء حتى تولي مطلوقة بحال عجينة السفنج المعروفة و
نديروه في سطل و نسدوه و نخليوه يخمر ثم نقليوه بالطريقة المعروفة

نصيحة من عند السيدة اسماء باش السفنج يجي بحال اللي كيتباع
كنديرو جوج مقالي وحدة فيها غير شوية الزيت و مقلة فيها بزاف ديال الزيت
كنهزو كويرات من العجينة و نثقبوهم باليد و نديروهم فالمقلة اللي فيها شوية
الزيت حتى يطلع السفنج و يتنفخ ثم نهزوه و نديروه فالزيت كثير و نخليوه
يكمل الطياب و يتحمر بهذه الطريقة كيجي السفنج غزال و مقرمش و ما شاربش
الزيت

مربى
الحامض
كيلو حامض مغسول مزيان (الى كانت فيه نقط سوداء نحكوه بشيتة)
كيلو الا ربع سنيدة
2 كيسان كبار ماء
الطريقة
نديرو الحامض صحيح في كوكوت و نغطيوه بالماء و نسدو الكوكوت و نحسبو 10
دقائق بعد الصفارة ونخليوه يبرد شوية و نزولو ليه شوية من التفل و نطحنو
القشور مع شوية التفل اللي بقى في الخلاط الكهربائي مع 2 كيسان ديال الماء
اللي عندنا و منين يتطحنو مزيان نردوهم للكوكوت و نزيدو عليهم سنيدة و منين
يغلي الخليط نقصو عليه النار و نخليوه يتعسل مع التحراك كيحتاج تقريبا ربع
ساعة و منين يوجد المربى نخليوه يبرد و نديروه في قراعي و نحتفظ به في
الثلاجة

انواع من الغريبة من عند السيدة مباركة من الراشيدية

(اختصاصية في الحلويات)
* 1 غريبة كاوكاو
المقادير
نصف كيلو كاوكاو محمر و مطحون
رابعة زبدة ماركرين
3 خمارات
2 فاني
رابعة سنيدة
شوية من نكهة اللوز
شوية من نكهة الزهر
راس ملعقة قرفة
طحين حسب الخليط (ماشي بزاف)
الطريقة
نخدمو الزبدة مزيان مع سنيدة و الفاني ثم نزيدو كاوكاو ثم الخميرة و
النكهات و القرفة و الطحين اللي يجمع الخليط ثم نديروها كويرات كبار شوية و
ندخلوها للفران يكون سخون من قبل و نقصو العافية و نطيبوها اولا من الوجه
حتى تتشقق عاد نطيبوها غير شوية من التحت

* 2 غريبة الكوك

المقادير
6 بيضات
2 كيسان عنبة سنيدة
كاس زبدة
كاس زيت
1 ياغورت فاني
علبة فواكه معسلة
نصف كيلو كوك + كاس و نصف عنبة كوك
2 خمارات
2 فاني
2 حتى ل 3 كيسان ديال الفورص الجيد (حسب الخليط)
التزيين
مازهر و سكر كلاصي
الطريقة
نخلطو البيض و سنيدة و الفاني و الزبدة و الزيت و الياغورت و الفواكه معسلة
(الى كانت كبيرة نقطعوها شوية) ثم نزيدو الكوك ثم الطحين شوية بشوية حتى
يتجمع الخليط خاص العجينة ما تكونش قاصحة (تكون بين و بين ) ثم ندهنو
يدينا بمازهر و نديرو كويرات من الخليط دون ضغط و نغبروهم مزيان بالسكر
كلاصي و نحطوهم بالمهل فوق لاطة مدهونة و ندخلو الحلوى للفران تطيب من
الوجه اولا ثم نطيبوها من التحت

فقاص مال
خديجة من وجدة

500غ احلطحين
2 بصلات مح****ن رقيقة
كاس المعدنوس رقيق غير الاوراق
1 كاس مخلط الزبدة وزيت
2 فرماجات مربعين
ملح الابزار
هريسة
شوية الكوزة

نخلطو كل المقادير وتحربل رقيقة
وتدخل للفرن حتى تجمد ويتقطع ويدخل للفرن
ممكن نحتافظو بيه فى المجمد ونجبدو منو
عند الحاجة

حلوة الفيرميسيل

زهور من قنيطرة

500غ الكركاع مطحون
500غ الشريحة مقطعة ومطحونة فى
الخلاط
750غ الشكلاط الاسود
3 اصفر البيض
الفيرميسيل الاسود
كويغطات
ابلكل يتخلط ويتجمع بالشكلاط مدوب
تكور او تحربل تفند فى الفيرميسيل ونحطوها فى الكويغطات وتبقى حتى تبرد
وتقدم

حياة
من سيدى المختار

250غ الشكلاط الاسود
250غ الشكلاط الابيض
200غ عجين اللوز
علبة صغيرة الفواكه المعسلة
غبرة الشكلاط
سليلات ورقية او كويغطات

ندوبو الشكلاط الاسود والابيض وندهنو
الكويغطات كل واحد بلون او ورقة بالاسود والاخرى بالابيض حتى الاخير
ونخليوهم يبردو مزيان من بعد نزولو الورق ونحتافظو بالشكلاط اللى على شكل
سليلات نديرو كويرا من اللوز وسطها فاكهة معسلة تنفند فى الشكلاط غبرة
ونحطوها فى السليلات وتقدم
هاد الحلوة كتوجد مباشرة عند التقديم

حلوى المربعات بمربى المشمش
500gزبدة لينة ،500gسنيدة ،4بيضات،3أكياس الحلوى،علبة مربى المشمش،الطحين
على حسب،نخلط الكل ماعدا المربى تفرد العجينة تقطع مربعات النصف مثقوب
والنصف من غير ثقب بعد ما يستوي نلصق حبات الحلوى بالمربى

كويرات الثلج

500g زبدة لينة ،نصف كوب زيت،كوب سنيدة،4بيضات،3أكياس خميرة الحلوى،500gجوز
الهند ،علبة مربى ،الطحين على حسب،يخلط الكل ماعدا جوز الهند
والمربى،تفرد العجينة تقطع دوائر صغيرة بعد آخراجها من الفرن وتبرد تغمس
كليا في المربى وتلصق كل حبتين ثم تفند في جوز الهند

حلوة الزبدة (فقط خفيفة مرة )
500gزبدة لينة ،1كيس خمارة الحلوى،الطحين على حسب (سنيدة،جوز هند،شكولاته
مذوبة في قليل من الزيت ،للتزيين)تخلط الزبدة مع الطحين وخميرة
الحلوى،تفردتقطع دوائر صغيرة نغمس الوجه في سنيدة وتصفف في صني مروشوش
بالطحين تدخل الفرن بعدا آخراجها وتكون بردت نلصق كل حبتين بالشكولاتة ثم
نمرر الجوانب في الشكولاتة أيضا ثم تمرر فيك جوز الهند

غريبة الفول السوداني وجوز الهند هذه الحلوى رائعة جربوها ما تندموا تبيض
الوجه

500gجوز هند،500gفول سوداني بقشوره الأحمر محمص ومطحون500g سنيدة،3معالق
كبار عسل ،6بيضات،2أكياس خميرة الحلوى،قليل من ماء الزهر،(سكر ناعم
للتزيين) يخلط الكل نعمل من الخليط كويرات صغيرة جدا لأنوا حجموا سيتضاعف
ثم يفند وجه حبات الحلوى في السكر الناعم،ويدخل الى الفرن حتى ياخذ اللون

مشوك
باللوز
المقادير
250غ زبدة
250غ سكر قلاسي
3صفار بيض
1/2كيس بيكنغ باودر
ملعقة الحليب بودر
ملعقة عسل
قشور برتقالة
طحين
التزيين
كرز مجفف
اللوز الممثوق
بياض البيض
الطريقة
-نخلط جيدا الزبدة والسكر ثم نضيف جميع المقادير ثم االطحين حتى تصبح عجين
طري نجعلها كويرات صغيرة نضعها في بياض لبيض ثم مرمدها في اللوز ثم نزينها
بالكرز المجفف ندخلها الفرن

حلوة كاوبيل

المقادير

250غ زبدة بحرارة المطبخ
1بيضة
كاس العنبة ديال السكر
نص كاس العنبة ديال الزيت
1 كيس الزا
1 فاني
2 م ك كاوبيل
الطحين حسب الخليط

للتزيين

شكلاط
نستلي
لوز مهرمش بقشوره
الطريقة

نخدمو مزيان الزبدة والسكر ونظيف ليه بيضة والزيت وفاني وكاوبيل
وفي الخير الزا والطحين

نعمل كرات صغار من العجينة و نغطس وجهها في البيض و نفندها في اللوز مهرمش
بقشوره وندير حفرة في الوسط
وندخلها للفران
ملاحظة: ملي طيب الحلوة من الجهة تحتانية و نكون غدي نطلعها للفوق ديك
الحفرة لي درناها كتنفخ ومكتبقاش كيف درناها كتولي تقريبا مسطحة فديك
اللحظة قبل منردها طيب من فوق كندخل فديك الحفرة اصبع ديالي او شي ملعقة
عندها شكل يدها مثل اصبع باش نلقا فين نعمر نستلي

وملي نخرجوها منالفرن وتبرد نعمرو الحفرة بنستلي و نزوقو بالشكلاط

الصراحة والله الا هاد الحلوة زويييييييييينة بزاف وملي تجربوها متستغناوش
عليها هي اقتصادية ولدييييييدة ممممممم

حلوة اللوز وكونفتير القرع

المقادير
1 كلغ لوز مسلوق مقسر ومكحون مع 40غ من السكر
نصف ملعقة صغيرة الزا
3 فاني
اصفر البيض (ممكن تحتاجي 3 او 4 على حسب العجينة)

للتزيين
كونفتير القرع
ابيض البيض
رقائق اللوز
سكر كلاصي

الطريقة

نطحنة اللوز الطحنة الاولى فقط مع السكر ونضيفو ليه الزا وفاني واصفر البيض

نطلقو شوي العجينة ديال اللوز ونديرو ليها في الوسط كنفتير القرع و نلفوها
وندهنوها ببياض البيض ونرشو عليها رقائق اللوز ونقطعوها بحال في الصورة
وملي طيب وتبرد نرشو عليها سكر كلاصي

حلوى وردة.

عقدة لوز( 500 غ لوز مصلوق مقشر ومطحون مع 250 غ سكر سنيدة +
قبة مسكة حرة + 2 ملاعق كبار ماء زهر+ نصف كاس صغير زبدة مذابة ) يخلط كل
جيدا وتقسم إلى 3 أقسام كل واحدة يضاف لها ملون غذائي مختلف ( أحمر-
أخضر- أصفر) وتعمل منها حرابل صغيرة .
عجين ( 500 غ دقيق +100 غ زبدة + ملعقة سكر + ربع كاس صغير
ماء زهر + قبة ملح + بيضة ) يخلط كل للحصول على عجين مثل عجين كعب غزال .
يبسط العجين وتقطع عرض 2 cm على طول 12cm وتضع وسطها حرابل
صغيرة من عقدة لوز وتلف وتحربل حتى يصبح عجين شفاف ، تقطع بسكين دون أن
تفصل بين كل ضربة سكين 1cm تلف على نفسها على شكل حلزوني مع رفع إلى أعلى
قليلا تصفف حلويات في صفيحة للفرن مرشوشة بدقيق وتتقب بإبرة وتترك لمدة 12
ساعة تقريبا لترتاح وتطهى في فرن متوسط

» نصائح من اللقاء المفتوح
» كيك الموز من اللقاء المفتوح
» وصفات من اللقاء المفتوح