طريقتي لتحضير كيكة طبقات

هاد الكيكة ماشي غريبة عليكم كلشي كيعملا بالطريقة ديالو ونا قلت نزل الطريقة ديالي تشوفوها وتقولولي رأيكم فيه أولا مقادير الكيكة وهي ساهلة :
2بيضات + 1 دانون فاني + 1 خمارة +1 لافاني + نصف كاس دانون بالزيت +نصف كاس دانون بالسكر + كأس دانون بالدقيق
نخدمها فحال اي كيكة ونعملوها في المول اللي كيتحل من الجنب مدهون بالزبدة والطحين

وهي كتطيب نوجدو حنا لاكريم باتيسيير ( بالحليب والبيضة والسكر ولافاني والمايزينا ) مللي نخرجو الكيكة من الفراننكبو فوق منها مباشرة لاكريم
ونجيبو الفواكه اللي متوفرة عنا فالدار ونزينوها بها مباشرة فوق لاكريم بشكل مرتب ومزيييييون ههههه
من بعد هاد الخطوة كنحطو كيكة ديالنا في الثلاجة وكنوجدو الفلان مكون من 3 خنيشات ديال الفلان العادي + 2 كيسان ديال العنبة عصير البرتقال + 3معالق ديال السكر نعملوهوم فوق البوطة حتى يغلى الخليط
نكبوه مباشرة فوق الفواكه ونرجعوه للثلاجة يبرد وهاهي الكيكة ديالنا واجدة وبالصحة والراحة.